Wir verblöden Bayern - ANTENNE BAYERN SONG


Teil 1:


Teil 2:


Wenn ma unsa Hoamat im Nama droggd, entbehrt des ned ana gewissn Verantwortung. Denn wenn ma sie säim ois Antenne Bayern, oiso Radio Bayerns bezeichnet soidad ma zumindest vasuacha des Land aa angemessna zu repräsentiern.
Wos alladings besagter Radiosender seit Jahren machd, is genau des Buidl vo Bayern zu vermittln, des uns persönlich sauba aufreggd. Des fangd bei da Sprach oh und head bei da Muse auf. Manchmoi kemma ned ummhin den Sender zu hean und wos ma do so miedgriang is echt a Frechheit.
I woas ned, ob de Moderatoren des mied Absicht machan, oda obses ned bessa kinnan und I woas aa ned wos schlimma warad, jädnfois rehn de in am „Boarisch“ des den Nahm ned vadient hod. Wia da letzte Breiss. Trauriga Höhepunkt war fia mi imma no as Championsleaguefinale in Minga, wo des Wort „dahoam“ derart verunstaltet worn is, dass ganz aus war. Wenn a „Nicht-Bayer“ des ned aussabringd, is ja koa Broblem, aba auf Antenne Bayern soidad ma moana es warad bessa.Dawei war as Gegnteil da Foi, wia geborne Norddeitsche hammses ausgsprocha, wia wenn sie sie fia eana Herkunft schamma daddn. Oda sie rehn so, wega da bessaren Verständlichkeit, dass jäda vastähd, damits a möglichst broade Zielgruppe ohsprecha kinnan. In dem Foi muase song, dass ma aa mied am sauban Dilaekt verstandn werd. Man braucht ja ned ummanandabäicha wia da letzte Hoizaff, aba a gscheids Boarisch komma drodzdem rehn. Des andane is ja, wenn olle vasuachan vo olle verstandn zu wern, dann head sie am End ois gleich oh und dann head üabahabds koana mehr zua, weil wenn ois gleich is, is ja sauba langweilig.
A andana Punkt is eana penetrante Fröhlichkeit, wia wenns auf Drogn warn. Säibst bei de Verkehrsnachrichtn miassns no an dumma Witz eibaun, aa wenn im säibn Satz no Doude oda Verletzte vorkemman, de des sicha aa sehr lusdig finden.
Üba Geschmack, bsundas wenns um Muse gähd lossd sie nadialich streitn, aba dass ma sie sei Brogramm vo da Musikindustrie diktian lossd und dadurch ja nia am einheimischn Künstler a Chance gibd, des is a andas baar Schua. Beweisn komma sowos nadialich ned, aba wenn in naxda Zeit wieda moi a neia, völlig übabewerteta, amerikanischa 10-Jähriga auf Antenne Bayern so lang gspuid wird, bis ma wirgglich moand, dassa guad is, dann komma sie ja moi seine Gedankn macha.
So war uns oiso Antenne Bayern bekannt und logischaweis ned grod unsa favorisierter Sender.
Dann hamms alladings ohgfangd, dass säim aa no Liada machan: Auf guad Boarisch hamms do gsunga „wir lieben Bayern“. Des hod uns dann dermassn gnervt, weilses nadialich, sie hoggan ja an da Quelle, jädn Dog gspuid hamm, eana „subba“ Komposition, dass ma gsogd hamm, do muas ma wos dageng unddanemma. Drumm hamma des Liad gmachd.
Wos ma aus dem ganzn fia sei Senderwahl folgert, is nadialich jädm säim übalossn, aba so vui sei gsogd, es gibd scho Alternativn, so is ned…

Scheene Griaß
De Laddshosen